Сайд Т.Мөнхсайханаар ахлуулсан ажлын хэсгийн бүрэлдэхүүнийг аймаг орон нутгийн удирдлагууд хүлээн авч уулзлаа. Уулзалтын эхэнд аймгийн ИТХ-ын дарга З.Эрхбаяр орон нутгийн эрүүл мэнд салбарт хийж хэрэгжүүлэхээр төлөвлөж буй ажлын талаар товч мэдээлэл өгөв. Үргэлжлүүлэн аймгийн Эрүүл мэндийн газрын дарга Б.Сүхнаран холбогдох мэдээлэл танилцуулж, шийдвэрлүүлэх шаардлагатай санал хүсэлтээ уламжиллаа. Санал хүсэлтийг хүлээн авч асуудлуудыг эрэмбэлэн, үе шаттайгаар шийдвэрлэж ажиллахаа Эрүүл мэндийн сайд энэ үеэр илэрхийлэв.Эхний ээлжид энэ оны 2-р улиралд багтаан БОЭТ-д MRI аппарат суурилуулахаар боллоо
Тус аппаратын үндсэн үнэ дөрвөн тэрбум төгрөг. Үүний хоёр тэрбум төгрөгийг аймгийн төсвөөс, бусад зардлыг Эрүүл мэндийн яамнаас шийдвэрлэнэ. Алслагдсан баруун бүс нутагт MRI оношилгоо нэвтэрснээр цаашид тархи, нуруу нугасны мэс засал, үе холбоос, зөөлөн эдийн гэмтэл бэртлийн шалтгаант мэс засал хөгжих ба Улаанбаатар хот руу явах иргэдийн оношилгоо, эмчилгээний зардал буурах давуу талтай.Мөн Манхан сумын эрүүл мэндийн төвд туулах чадвар сайтай авто машин гардуулан өгч, алслагдсан сум, багийн иргэдэд үзүүлэх эрүүл мэндийн тусламж, үйлчилгээний түргэн шуурхай байдлын хүртээмжийг нэмэгдүүллээ Ажлын хэсэг үргэлжлүүлэн аймгийн Эрүүл мэндийн газар, БОЭТ-ийн үйл ажиллагаатай танилцах, эмч мэргэжилтнүүдтэй уулзалт зохион байгуулж, санал хүсэлтийг нь сонсож ажиллана.
