Зол жаргалын өлгий Завхан нутгийнхаа уугуул, суугуул иргэд та бүхнийхээ амар амгаланг айлтган 17-р жарны “Элдэв эрдэнэт” хэмээх модон могой жилийн сар шинийн мэндийг дэвшүүлье.

Улиран өнгөрч буй хөхөгчин луу жил Завханчууд бидэнд ивээл буянаа хайрлан бороо хуртай, өвс ургамал жимс ногоо дэлгэрч буянт малын тарга хүч чамбайрч сүү цагаан идээ бялхсан сайхан зун, намар болж улмаар өвс цас нь жигдэрсэн өнтэй дулаан өвөлжиж сайхан жил болж өнгөрч байна.

Луу жилд Завханчууд бид Дилов хутагт Данзанламэд гэгээнтэндээ хүндэтгэл үзүүлэн сэнтийд нь залж, Монгол Улсын Ерөнхий сайд Жалханз хутагт Ц.Дамдинбазарын мэндэлсний 150 жилийн ой, Улиастайн сайд Дилов хутагт Б.Жамсранжавын мэндэлсний 140 жилийн ойг тэмдэглэн эрдэм шинжилгээний хурал болон бусад олон арга хэмжээ зохион байгуулж, аймгийн ИТХ-аар аймгийн төвийн төв талбайг “Жалханз хутагт Дамдинбазар”-ын нэрэмжит болгосон.

Мөн луу жилд Завханчууд бидний дундаас Олимпийн аварга, Тод манлай уяач, Монгол улсын начин цолтон шинээр төрж, төр засагтаа хөдөлмөрөө үнэлүүлж хөдөлмөрийн баатар, гавьяат цолтон, “Аймгийн хүндэт иргэн”, төрийн одон медальтан олон арваар шагнагдан, малчин түмнээс маань Монгол Улсын аварга малчнаар 10 өрх, Аймгийн хошой аварга малчин 12, аймгийн аварга малчнаар 90 өрх шалгарч бид бүхний бахархал болсон юм.

Угтан золгож буй хөхөгчин модон могой жилд хүний эрхийг дээдэлж хөгжил рүү чиглэсэн авто замууд, орон сууцжуулалт, сургууль цэцэрлэг эмнэлгийн барилгуудын засвар, тоног төхөөрөмжүүд, сум төвлөрсөн газруудын гудамжны гэрэлтүүлэг, камержуулалтууд хийгдэхээр “Аймгийн хөгжлийн төлөвлөгөө”-нд тусган хэрэгжилтийг эхлүүлээд байна.

Завханчууд та бүхэндээ аймгийн ИТХ-ын нэрийн өмнөөс болон хувиасаа сар шинийн мэндчилгээг өргөн дэвшүүлж сайн сайхныг хүсэн, айл хотлоороо амар амгалан, ахан дүүсээрээ төвшин сайхан шинэлэхийн ерөөлийг өргөе.

САР ШИНЭДЭЭ САЙХАН ШИНЭЛЭЭРЭЙ.