Аймгийн иргэдийн Төлөөлөгчдийн Хурал, аймгийн Хүнс хөдөө аж ахуйн газар, Мал эмнэлгийн газар хамтран “Хүнс хөдөө аж ахуйн салбарын хөгжлийг дэмжих дэд хөтөлбөр”-ийн 2 дахь шатны хэлэлцүүлгийг өнөөдөр(2025.03.21) амжилттай зохион байгууллаа.
Хэлэлцүүлэгт аймгийн ИТХ-ын төлөөлөгчид, ИТХ-ын ажлын албаны зохион байгуулалт, олон нийттэй харилцах хэлтсийн дарга Д.Үнэнхүү, ЗДТГ-ын Хөгжлийн бодлого төлөвлөлт, хөрөнгө оруулалтын хэлтсийн дарга Д.Азжаргал, Мал эмнэлгийн газрын дарга Б.Чимиддорж, Тариалан эрхлэгчдийн холбооны тэргүүн Б.Мөнхбаатар, Хүнс хөдөө аж ахуйн газрын хамт олон, Улиастай, Алдархаан, Эрдэнэхайрхан сумын малчид, тариаланчид нийт 70 гаруй иргэд оролцлоо.
Хэлэлцүүлгийн эхэнд ХХААГ-ын Захиргаа удирдлагын хэлтсийн дарга А.Батзаяа Хүнс хөдөө аж ахуйн газрын ерөнхий мэдээллийг танилцуулан, үргэлжлүүлэн Мал аж ахуйн хэлтсийн ахлах мэргэжилтэн, хэлтсийн даргын үүргийг түр орлон гүйцэтгэгч Н.Бямбасүрэн хөтөлбөрийн төслийг танилцуулан хэлэлцүүллээ.
Тус хөтөлбөрийн төслийг 24 сумын Хөдөө аж ахуйн тасгийн хамт олон малчид, иргэдэд танилцуулан санал авч нэгтгэх ажиллагаа явагдаж байгаа бөгөөд хэлэлцүүлэг, уулзалтуудын үеэр хөтөлбөрийн төсөлтэй холбоотой иргэний нийгмийн байгууллага, мэргэжлийн холбоод, иргэдийн хэлсэн саналыг тусган аймгийн ИТХ-ын Байгаль орчин, хөдөөгийн хөгжлийн хорооны болон Зөвлөлийн хуралд танилцуулан ИТХ-ын хуралдаанаар хэлэлцүүлэн батлах юм.
