Аймгийн ИТХ-ын Байгаль орчин, хөдөөгийн хөгжлийн хорооны хурал танхим, цахим хосолсон хэлбэрээр 85,7 хувийн ирцтэй зохион байгуулагдаж, хурлыг аймгийн ИТХ-ын төлөөлөгч, тус хорооны дарга Б.Болдбаатар удирдан явууллаа.

Хуралд МУ-ын Хөдөлмөрийн баатар, Гавьяат зоотехникч Л.Лхасүрэн урилгаар оролцов.

Хурлаар аймгийн Хүнс хөдөө аж ахуйн газраас “Аймгийн Хүнс, хөдөө аж ахуйн салбарын хөгжлийг дэмжих хөтөлбөрийн төсөл”-ийг хэлэлцүүлэв.

Тус хөтөлбөрийг “Мал аж ахуйг уур амьсгалын өөрчлөлт, нийгмийн хөгжлийн чиг хандлагад нийцүүлэн хөгжүүлж, зах зээлийн нөхцөлд өрсөлдөх чадвартай, эдийн засгийн үр ашигтай салбар байх нөхцөлийг бүрдүүлэх”, “Газар тариалангийн үйлдвэрлэлийг орон нутгийн байгаль цаг уурын онцлог, бүсийн хөгжлийн үзэл баримтлалд нийцүүлэн, усалгаатай газар тариаланг хөгжүүлэх замаар дотоодын хэрэгцээт малын тэжээлийн 60%-ийг, төмс хүнсний ногоог бүрэн хангах”, “Хүнс, жижиг дунд үйлдвэрлэл эрхлэгч иргэн, аж ахуйн нэгжийг бодлогоор дэмжих, орон нутгийн хүн амыг эрүүл аюулгүй баталгаат хүнсээр хангах” зэрэг 3 зорилт 39 арга хэмжээний хүрээнд 2025-2029 онд хэрэгжүүлэхээр төлөвлөсөн байна.

Хорооны гишүүд хөтөлбөрийн төслийг нэг бүрчлэн хэлэлцэж, саналаа өгч хөтөлбөрийг ИТХ-ын Зөвлөлийн хурлаар хэлэлцүүлэхээр шийдвэрлэлээ.