3 дугаар сарын 15-ны өдрийн байдлаар Дархан-Уул аймагт Улаанбурханы өвчлөлийн 839 тохиолдол бүртгэгдээд байна. Нэгдсэн эмнэлгийн Халдвартын тасагт 55 хүн хэвтэн эмчлүүлж байгаагийн 11 насанд хүрэгчид, 44 бага насны хүүхэд байна. ШШГЕГ-ын харьяа Хорих 435 дугаар ангид Улаанбурханы тохиолдол бүртгэгджээ. Үүнтэй холбоотойгоор аймгийн ЭМГ-аас холбогдох албаныхан голомтод ажиллаж, тус ангийн албан хаагчид, хоригдлуудад Тархвар судлалын заалтаар дархлаажуулалт хийж байгаа мэдээ ирлээ. Мөн ЭМГ-ын Нийтийн эрүүл мэндийн төвөөс Төрийн байгууллагуудын ажилтан, албан хаагчдад “Улаанбурханы өвчлөлөөс урьдчилан сэргийлэх” тухай заавар зөвлөмж өгч байгаа юм. Үүний хүрээнд өнөөдөр /2016.03.15/ аймгийн ЗДТГ-ын ажилтнуудад ЭМГ-ын НЭМТ-ийн дарга С.Энхжаргал тус өвчнөөс урьдчилан сэргийлэх, илрэх шинж тэмдэг, өвчилсөн тохиолдолд авах арга хэмжээ, дархлаажуулалт зэрэг зөвлөгөө, мэдээлэл хийлээ.